La Fatalité d’amour

COMMENT, ie l’aime encore, & ne puis me distraire D’obseruer tous les iours sa grace & ses appas ? Ô cruelle influence à mon bon-heur contraire Qui me forces d’aimer ce qui ne m’aime pas !

Puisque de ma raison le conseil salutaire N’a pas eu le pouuoir d’en destourner mes pas ; Il faut à la faueur d’vne mort volontaire S’affranchir d’vn tourment pire que le trespas.

Sortons, sortons par là de ceste seruitude, Où la beauté s’accorde auec l’ingratitude Pour chercher de la gloire à nous faire du mal.

Et cessant de mourir d’vne mort continuë, Allons voir si l’Enfer est vn supplice égal À celuy d’vne amour qui n’est point reconnuë.