La belle malade (stances)

IE ne sçay par quelle rigueur Les Destins jaloux de ma flame, Mettent vostre Corps & mon Ame Dans vne si triste langueur.

Cet Astre qui nous fait la guerre, Va perdre toute la beauté Et toute la fidelité Qui parust iamais sur la Terre.

Ce traict m’a le premier atteint ; Mais du Ciel la ialouse enuie Doit plustost effacer ma vie Que les roses de vostre teint :

Ie me meurs de cette auanture ; La tristesse m’enseuelit, Et si vous ne sortez du lit, I’entre dedans la sepulture.