Le Ravissement d’Europe

EVROPE s’apuyant d’vne main sur la croupe, Et se tenant de l’autre aux cornes du Taureau, Regardoit le riuage & reclamoit sa troupe Qui s’affligeoit de voir cét accident nouueau.

Tandis, l’amoureux Dieu qui brusloit dedans l’eau Fend son jaspe liquide & de ses pieds le coupe Aussi legerement que peut faire vn vaisseau, Qui le vent fauorable a droitement en poupe.

Mais Neptune enuieux de ce rauissement, Disoit par moquerie à ce lascif Amant Dont l’impudique ardeur n’a iamais eu de bornes.

« Inconstant qu’vn sujet ne sçauroit arester, « Puisque malgré Iunon tu veux auoir des Cornes, « Que ne se resout-elle a t’en faire porter.