Les justes reproches

CLorinde ie le cognoy bien Mes soins n’obtiendront iamais rien D’vne ingratitude si noire. Ma plainte aigrist vostre rigueur, Et bien loing d’estre en vostre cœur, Si ie suis en vostre memoire C’est pource que vous faites gloire De me voir mourir en langueur.

I’ay beau par mille inuentions Vous descouurir mes paßions Et les rigueurs de vostre Empire : I’ay beau vous monstrer mes desirs Et vous conter mes déplaisirs ; Vous ne faites iamais que rire De mon trouble & de mon martyre, De mes pleurs & de mes souspirs.

Si i’approche de vostre lict Quand vostre beau corps l’embellit Et met les Graces à leur aise : Dés que ie regarde vos bras, Si bancs, si polis, & si gras, Dont la neige augmente ma braise, De crainte que ie ne les baise, Vous les retirez dans vos draps.

Mes pleurs ont fait assez d’effort Ie ne sçay plus rien que ma mort, Qui puisse adoucir vostre haine : Puisque c’est inutilement Que ie vous conte mon tourment, Belle ingrate, belle inhumaine, Il faut sortir de cette peine Par la porte du monument.