Je ne suis plus un homme, ou bien si je le suis

 Ie ne suis plus vn hõme, ou bien si ie le suis, Ie suis tant seulement un homme en pourtraicture ; Mais helas ! vn pourtraict ne sent point sa blessure, Ie suis peinture au bien, & vrai homme aux ennuis.  il y a ia deux ans, Amour, que tu me suis Ainsi qu’vn Cerf blessé d’vne fiere poincture, Et mon mal furieux n’a point de sepulture, Ni n’en veut que du dard de celui que ie fuis.  Ie ne suis point helas ! ni l’homme ni l’image, Ains ie suis vne beste aueugle & sans courage, Qui fuit sa liberté & cerche sa prison :  N’est-ce pas estre tel que d’estre fantastique, Priser & despriser le monde & sa pratique, Croire son appetit, & fuir sa raison.

A. D. V.