I

Ci est le Rommant de la Rose, Où l'art d'Amors est tote enclose.

Maintes gens dient que en songes N'a se fables non et mençonges; Mais l'en puet tiex songes songier Qui ne sunt mie mençongier; Ains sunt après bien apparant. Si en puis bien trere à garant Ung acteur qui ot non Macrobes; Qui ne tint pas songes à lobes; Ainçois escrist la vision Qui avint au roi Cipion. Quiconques cuide ne qui die Que soit folor ou musardie De croire que songes aviengne, Qui ce voldra, pour fol m'en tiengne; Car endroit moi ai-je fiance Que songe soit senefiance Des biens as gens et des anuiz, Car li plusors songent de nuitz Maintes choses couvertement Que l'en voit puis apertement.

LE ROMAN DE LA ROSE