Doux objet de mes desirs

Doux objet de mes desirs, Charme de mon ame seduite, Où vous envollez vous si vite ? Me laissant dans ces desplaisirs Où vous m'avez ainsi reduite,

Sera-ce donc à ceste fois Que la cruelle tragedie Donra ceste entorce à ma vie, Et que ma languissante voix Mourra dans l'air esvanouye ?

Ceste offence est hors de pardon : Car au lieu de prendre les armes Pour me sauver de ces vacarmes Vous me laissez à l’abandon L’ame aux douleurs Les yeux aux larmes

Je le sçay, vous craignez de voir Ceste orpheline desolee D’une nuict de chagrins voilee Heurter au roc du desespoir, A faute d’estre controlee.

Quand vous serez doncques absent L’as d’où voulez vous que je tire Moyen d’affoiblir mon martire ? Qui se va sur moy renfonçant Alors que vostre œil se retire.

J’ay beau de vous me souvenir, Il faut que je le confesse, La foule des maux m’oppresse Ne se peut guere soustenir Par une idee de liese.

Je n’ay point l’esprit contrefait, Et n’est possible que j’assemble Ces deux contraires tout ensemble, Que je sois pour vous tout à fait, Et que pour l’autre je le semble.

Mais puis que fuyant vostre arrest Il faut prouver que je vous aime, Je voudrois en ce mal extreme, Qu’au moins quand mon mal sera prest Mon remede fust prest de mesme.

J’endurerois mille fois mieux Tout ce mal qu’il faut que j’endure Mais je suis mise à l’adventure, Et le beau secours de vos yeux S’enfuit du mal qui me demeure.

Mais quoy ? je me travaille en vain, J'augmente par ma doleance De mes malheurs ma violence, Et mon remede plus certain Ne despend plus que du silence.

Adieu beaux yeux, yeux tant aimez Allez où vostre ame est poussee, Chez nourrissons de ma pensee Je ne vous laisseray jamais Encore que vous m'avez laissee.