Ach mir was lange

ACh mir was lange nach ir so we gesin dauon dachte ich vil ange dc ir das wurde schin ich nam ir achte in gewande als ein pilgerin so ich heinlichste machte do si gieng von mettin do hate ich vo sender klage einen brief dar an ein angil was den hieng ich an si dc was vor tage das si nit wisse das

Mich dúchte si dechte ist das ein tobig man was wolde er in die nechte dc er mich grîffet an si vorchte ir sere min frowe wolgitan doch sweig si dur ir ere vil balde si mir intran des was ich gegin ir so gehe das echt si balde kême hinin dur das den brief nieman an ir gesêhe si brachte in tǒgin hin

Wie si im do tete des wart mir nit geseit ob si in hinwurfe ald hete das tůt mir sende leit las si in mit sinne so vant si seligheit tiefe rede von der minne was not min herze treit dem tet si nie sit giliche das ir min not ie rechte wurde kunt owe reine minnenkliche dú tůst mich sere wunt

IN getorste gisenden nie keinen botten ir wan si nie wolde ginenden ir trost irzeigen mir der ir kunt tete wie kûme ich si verbir vnd si gnaden bete nach mines herzen gir da uorchte ich ir vngedulde wan si mir ist darumb gihas dc ich so gar gerne hete ir hulde warumbe tůt si das

MIn herze sere si mir durbrochen hat wan si da dur dú here so giwaltekliche gat hin vnd herwider doch es si gerne enpfat si lat sich drinne ǒch nider mit wunnen die si hat si kan so gefüge wesin swie si mer danne min herze si swie si drinne gat des mag ich ginesin arges ist si so fri

MIch dunket man sehe min frowen wol getan der mir min brust vf brehe in minem herzen stan so lieblich reine gar wiblich lobesan in wige es doch nicht kleine das ich so mag han nu můs si mir doch des gunnen swie sere si sich frömdet mir doch gan si mir nicht der rechten wunnen der ich ie můte zir

Owe dú minne wie wil si mich nu lan vnd ich doch mine sinne an ir bihalten han dc noch min herze nie trost von ir gewan des wil mir sender smerze von not gesigen an sin kere mirs dannoch zegůte das si die reinen twinge gegen mir e das si mir zeheile der leiden hůte dur trúwe gar enge