Er můs sin ein wol beraten elich man

ER můs sin ein wol beraten elich man der hus sol han er müsse in sorgen sten notig lidig man fröit sich doch mangen tag er sprichet ich mag mich einen sanft begen ach notig man kumst du zer e wan du kume gewinnen macht můs vnde brot du kumst in not hus sorge tůt so we

So dich kint anuallent so gedenkest du war sol ich nu min not was e so gros wan dú fragent dike wa brot vnd kese si so sizzet dabi dú můter ratis blos so sprichet si meister gib vns rat so gist in dan rúwental vnd súftenhein vnd sorgen rein als der niht anders hat

So spricht si dan· ach das ich ie kan zů dir ian haben wir den witte noch das smalz noch das fleisch noch vische pfeffer noch den win was wolte ich din son kan wir niender salz so rúwetz ir· da sint fröide vs da vat frost vnd turst den hunger in das har vnd zihent gar oft in al dur das hus

Mich dunket das hus sorge tůie we doch klage ich me das mir min frowe tůt swenne ich fúr si gen dur das si grüsse mich so kert si sich von mir dc reine gůt so warte ich iemerlichen dar vnd sten verdacht als ein ellender man der mich enkan vnd des nieman nimt war

Das si mich verseret hat so manig iar das wolt ich gar lieblich vergeben ir grůste si mich als man frúnde grüssen sol so tete si wol si súndet sich an mir wan ir min trúwe wonet bi dauon solte si mich grüssen ane has wan tůt si das das si iemer selig si