Der vil edle Reginsberger was vor ir

Der vil edle Reginsberger was vor ir vnd bat si mir genedig sin vnd dc si ze mir sprech got grüsse min diener das das sin ger des herren min si sprach zartlich zwar herre das můs ergan vnd lobte ims mit ir wîssen hende in sin hant min leit verswant dos mir fúr kan

DA waren edle frowen edle herren bi der stunt do si gelobte das ich wand ... das sis stete liesse wans vor in bischach von eschibach der herre da was vnd der von Trosberg· der von Tellinkon ich wand dc mir solte ir trost da werden schin swie ich des bin von ir vngewon

Svst besante der werde Reginsberger mich mit im gieng ich dar vf der trost ich wande das ich leides fri da wurde iesa do wart ich da fröiden erlost si slos sich in ein stuben der gischicht er bat si vnd edil frowen edil man vil har vs gan do half es nicht

Si suns ir nicht wîssen si ist vnschuldig gar ich brachte es dar da vůgte dc das was min ungelúke das ich han gegen ir das vůgte mir ir strengen has swas mich ir hulden irre dc müsse zergan es tüie danne ir lib in sol ir flůchen nicht swas mir geschicht heil müsse si han

Owe das si mir nicht fröiden gunde vor ir we tet doch mir so we der pin das si vor mir barg ir lib so minnenklich ach si lie mich in iamer sin sin wolte har us nicht e ich dannan kan sust vůgte es sich dc ich ir da nit gesach dc leit geschach mir senden man

ICh irgieng mich vor der stat doch ane var do gidachte ich gar lieblich an si sazehant irsach ich verre ir schonen lib da schone wib ir sâssen bi do engonde si mir fröiden nicht vor ir si gieng dannan do si sach das ich gieng dar das nimt noch gar vil fröiden mir

Liebú mere seit doch ein gůt ritter mir das lieblich ir mvnt· von mir sprach si sprach wa ist min geselle dc was minnenklich ich fröiwe mich das ie geschach das si vs mir gerůchte reden so dc schat ir vil kleinen vnd hilfet mich wol si ist tugende vol des bin ich fro

ICh kam ir ze wege da si gar eine gie do gisprach ich nie kein wort zůzir ich irschrak· von minnen in mochte hin noch dan ich sachs echt an da wart doch mir si gieng ǒch vúr dc si nit grůste mich dc verzagte mich ǒch des ich· nit ensprach vnd do ich si sach so minnenklich

Minne sûmet an mir vaste ir trúwen sich si twinget mich minnen so ho wan si nie min frowen gegen ir gitwang si habe vndank wie tůt si so was habe ich ir getan· si swechet sich twunge si gegen mir ir lib so tugende vol so tete si wol wes zihet si mich

Das dú minne mich so sere bitwungen hat vnd das si lat ir lib so fri dauon weis ich· das si hat verraten mich sin kere sich danne ǒch an si vnd twinge si min noch genade han owe minne wild das tůn so tůs in zit wan sender strit wil mich erslan

Frowe min ich man der rechten trúwen dich wan die han ich recht gegen dir dc du mir des gunnest das ich zů dir ge da nieman me si wan echt wir an argen list můte ich des frowe dir in wolt nicht wan klagen dir min sendes leit ach seligheit des gunne mir