Es wirfet der ivngen vil

Es wirfet der ivngen vil vf der strassen einen bal dast des svmers erstes spil der selbe gogelliche schal meldet einen ziteling dc ist ein spil vnd ein ding des ich iemer gerne embir wc ob mir des dorfes neue gêbe einen stôs des vnfůge ist alse grôs wan er wipfet her vnd dar in der schar er kan fliehen vnd iagen· mit dem wurfe triegen svs machent vmbe den giegen ie zwei vnd zwei ein hopelrei reht sam si wellen fliegen

Boppe iöchet envnt her alsam er habe ein wilt ersehen so kvmt einer heisset ber schachende vnd wil ǒch spehen ob im der bal werden mv́ge vnzitiger krankes flúge mag man wunder schowen da iara ia wie die megde schúllen loben wie si glijen wie si toben swenne er den bal werfen sol sost in wol wan er welt wem er den bal dvr die lúfte sende si bietent im ir hende dv bist doch min geveterlin wirf mir her an dis ende

Vnserm neuen túnzel tůt nit so wol so dc dú kint iv́telin vnd elsemv̊t vor im vf dem anger sint swelhú den bal kan beiagen dú sol lob ze vorderst tragen der von rvmpolzkrvmpoltz lief vnd rief wirf mir her ich wirfe dir wider er sties manige dirne nider als in sin vnfůge hies dar nach sties erkenbolt ein dirnelin· dc lief nach dem balle er sties es imme schalle vber eppen bein dc im erschein ein kniekel von dem valle