Ez gruonet wol diu heide

Ez gruonet wol diu heide; mit grüenem loube stât der walt. der winder kalt twanc si sêre beide. diu zît hât sich verwandelôt. mîn sendiu nôt mant mich an die guoten, von der ich unsanfte scheide.

Gegen der wandelunge wol singent elliu vogelîn den vriunden mîn, den ich gerne sunge, des sî mir alle sagten danc. ûf mînen sanc ahtent hie die Walhen niht. sô wol dir, diutschiu zunge!

Wie gerne ich nu sande der lieben einen boten dar, (nu nemt des war!) der daz dorf erkande, dâ ich die seneden inne lie. jâ meine ich die, von der ich den muot mit staeter liebe nie gewande.

Bote, nu var bereite ze lieben vriunden über sê! mir tuot vil wê sendiu arebeite. dû solt in allen von uns sagen, in kurzen tagen saehens uns mit vröuden dort, wan durch des wâges breite.

Sage der meisterinne den willeclîchen dienest mîn! si sol diu sîn, diech von herzen minne vür alle vrouwen hinne vür. ê ichs verkür, ê wold ich verkiesen, deich der nimmer teil gewinne.

Vriunden unde mâgen sage, daz ich mich wol gehabe! vil lieber knabe, ob si dich des vrâgen, wiez umbe uns pilgerîne stê, sô sage, wie wê uns die Walhen haben getân! des muoz uns hie betrâgen.

Wirp ez endelîchen! mit triuwen lâ dir wesen gâch! ich kum dar nâch schiere sicherlîchen, so ich aller baldist immer mac. den lieben tac lâze uns got geleben, daz wir hin heim ze lande strîchen!

Ob sich der bote nu sûme, sô wil ich selbe bote sîn zen vriunden mîn: wir leben alle kûme; daz her ist mêr dan halbez mort. hey, waere ich dort! bî der wolgetânen laege ich gerne an mînem rûme.

Sol ich mit ir nu alten, ich het noch eteslîchen dôn ûf minne lôn her mit mir behalten, des tûsent herze wurden geil. gewinne ich heil gegen der wolgetânen, mîn gewerft sol heiles walten.

Si reien oder tanzen, si tuon vil manegen wîten schrit, ich allez mit. ê wir heime geswanzen, ich sage iz bî den triuwen mîn, wir solden sîn zOesterrîche. vor dem snite sô setzet man die phlanzen.

Er dünket mich ein narre, swer diesen ougest hie bestât. ez waer mîn rât, lieze er siech geharre und vüer hin wider über sê; daz tuot niht wê; nindert waere baz ein man dan heime in sîner pharre.

Ich wil gein Ôsterrîche an einer züllen swattgen hin. war kom mîn sin, daz ich so trunkenlîche driu snelliu ros vertoppelt hân? des muoz ich gân. koufet ieman setele, ich gibes im sicherlîche.