Descen du ciel Calliope

DEscen du Ciel Calliope, & repousse Tous les ennuis de moy ton nourisson, Soit par ton luth ou soit par ta voix douce Et mes soucis charme de ta chanson. Par toy ie respire, Par toy ie desire Plus que ie ne puis : C’est toy, ma Princesse, Qui me fais sans cesse Fol comme ie suis. Dedans le ventre auant que né ie fusse, Pour t’honorer tu m’auois ordonné : Le Ciel voulut que ceste gloire i’eusse D’estre ton chantre auant que d’estre né. La bouche m’agrée Que ta voix sucrée De son miel a peu, Et qui sur Parnase De l’eau de Pegase Gloutement a beu. Heureux celuy que ta folie affole, Heureux qui peut par tes traces errer : Celuy se doit d’vne docte parole Hors du tombeau tout vif se déterrer. Pour t’auoir seruie, Tu as de ma vie Honoré le train : Suiuant ton escole, Ta douce parole M’eschauffa le sein. Dieu est en nous, & par nous fait miracles : D’accords meslez s’egaye l’Vniuers : Iadis en vers se rendoient les oracles, Et des hauts Dieux les Hynnes sont en vers. Si dés mon enfance Le premier de France I’ay pindarizé, De telle entreprise Heureusement prise Ie me voy prisé. » Chacun n’a pas les Muses en partage, Et leur fureur tout estomac ne poind : A qui le Ciel a fait tel auantage, Veinqueur des ans son nom ne mourra point. Durable est la gloire Tousious la memoire Sans mourir le suit : Comme vent grand erre Par Mer & par Terre S’escarte son bruit. C’est toy qui fais que i’aime les fontaines Tout esloigné du vulgaire ignorant, Tirant mes pas par les roches hautaines Apres les tiens que ie vais adorant, Tu es ma liesse, Tu es ma Deesse ; Tu es mes souhais : Si rien ie compose, Si rien ie disspose, En moy tu le fais. Dedans quel Antre, en quel desert sauuage Me guides-tu, & quel ruisseau sacré Fils d’vn rocher, me sera doux breuuage Pour mieux chanter ta louange à mon gré ? C’a page, ma Lyre, Ie veux faire bruire Ses languettes d’or : La diuine grace Des beaux vers d’Horace Me plaist bien encor. Mais tout soudain d’vn haut stile plus rare Ie veux sonner le sang Hectorean, Changeant le son du Dircean Pindare Au plus haut bruit du chantre Smyrnean.