Du malheur de receuoir

DV malheur de receuoir Vn estranger sans auoir De luy quelque cognoissance, Tu as fait experiance Menelas, ayant receu Pâris dont tu fus deceu : Et moy ie la viens de faire, Qui ore ay voulu retraire Sottement vn estranger Dans ma chambr & le loger. Il estait minuict & l’Ourse De son char tournoit la course Entre les mains du Bouuier, Quand le somme vint lier D’vne chaine sommeilliere Mes yeux clos sous la paupiere. Ia ie dormois en mon lit Lors que i’entr’ouy le bruit D’vn qui frappoit à ma porte, Et heurtoit de telle sorte Que mon dormir s’en-alla : Ie demanday, Qu’est-ce là Qui fait à mon huis sa plainte ? Ie suis enfant, n’aye crainte, Ce me dit-il, & adonc Ie luy desserre le gond De ma porte verrouillée. I’ay la chemise mouillée Qui me trempe iusqu’aux oz, Ce disoit, dessus le doz Toute nuict i’ay eu la pluie : Et pource ie te supplie De me conduire à ton feu Pour m’aller seicher vn peu. Lors ie prins sa main humide Et plein de pitié le guide En ma chambre & le fis seoir Au feu qui restoit du soir : Puis allumant des chandelles, Ie vy qu’il portoit des ailes, Dans la main vn arc Turquois, Et sous l’aisselle vn carquois. Adonc en mon cœur ie pense Qu’il auoit quelque puissance, Et qu’il falloit m’apprester Pour le faire banqueter. Ce-pendant il me regarde D’vn œil, de l’autre il prend garde Si son arc estoit seiché : Puis me voyant empesché A luy faire bonne chere, Me tire vne fleche amere Droict en l’œil : le coup de là Plus bas au cœur deuala : Et m’y fit telle ouuerture, Qu’herbe drogue ny murmure N’y seruiroient plus de rien. Voila, Robertet, le bien (Mon Robertet qui embrasses Les neuf Muses & les Graces) Le bien qui m’est aduenu Pour loger vn incognu.