En quel bois le plus

EN quel bois le plus separé Du populaire, & en quel Antre Prens-tu plaisir de me guider, O Muse ma douce folie: A fin qu'ardant de ta fureur, Et du tout hors de moy ie chante L'honneur de ce royal enfant Qui doit commander à la France? Ie cri'ray des vers non sonnez Du Grec ny du Latin Poëte, Plus hautement que sur le mont Le Prestre Thracien n'entonne Le Cor à Bacchus dedié, Ayant la poitrine remplie D'vne trop vineuse fureur. Il me semble desia que i'erre Seul par les Antres, & qu'au fond D'vne solitaire vallée Ie chante les diuins honneurs Du grand-pere & du pere ensemble. Tandis Muse sur son berceau Seme le Liz, seme la Rose, Seme la Palme & le Laurier, L'honneur des veinqueurs és batailles Ie preuoy qu'il vous aimera, Et employra la mesme dextre Dont guerrier il aura veincu L'Espagnol & l'Anglois superbe, A polir des vers qui feront Voler son nom par-sus la terre, Imitateur du grand Cesar Vaillant & sçauant tout ensemble, Qui le iour vestoit le harnois, Et en robbe escriuoit ses gestes.