Escoute moy fontaine

EScoute moy Fontaine viue, En qui i'ay rebeu si souuent, Couché tout plat dessus ta riue Oisif à la fraicheur du vent: Quand l'Esté mesnager moissonne Le sein de Cerés déuestu, Et l'aire par compas resonne Gemissant sous le blé batu: Ainsi tousiours puisses-tu estre En religion à tous ceux Qui te boiront, ou feront paistre Tes vers riuages à leurs beufs. Ainsi tousiours la Lune claire Voye à mi-nuict au fond d'vn val Les Nymphes pres de ton repaire A mille bonds mener le bal, Comme ie desire Fontaine, De plus ne songer boire en toy L'Esté, lors que la fiéure ameine La mort despite contre moy.