Le Medecin de la peine

» LE medecin de la peine » Est le plaisir qui ameine » Le repos auecque luy, Et les Odes qui nous flatent Par leurs douceurs qui abbatent La memoire de l’ennuy. Le bain ne soulage pas Si bien les corps qui sont las, Comme la loüange douce Nous soulage, que du pouce Faisons sur le luth courir, Par qui les playes de l’ame ( Lors qu’vn desplaisir l’entame) Nous oignons pour la guerir. Certes ma chanson sucrée, Qui les grands Princes recrée, Pourra ton front dérider Apres ta peine publique, Où ta faconde s’applique Pour la ieunesse guider. O mon Daurat, ton sçauoir Par ce siecle nous fait voir Que tu brises l’Ignorance, Renommé parmy la France Comme vn oracle des Dieux, Pour desnouer aux plus sages Les plus ennouez passages Des liures laborieux. Tant d’ames ne courent pas Apres Alcee là bas, Quand hautement il accorde Les guerres dessus sa corde, Comme ta douce merueille Emmoncelle par milliers Vn grand peuple d’escoliers Que tu tires par l’oreille.