Lors que la tourbe errante. Prophetie de la Charante

LOrs que la tourbe errante S’arma contre son Roy, Le Dieu de la Charante, Fasché d’vn tel desroy, Arresta son flot coy : Puis d’vne bouche ouuerte A ce peuple sans loy Prophetisa sa perte. Ia desia te desserte Te suit peuple mutin, Qui ma riue deserte Saccages pour butin : Mais le cruel Destin Que ton orgueil n’arreste, Viendra quelque matin Te foudroyer la teste. Oy de Mars la tempeste D’escailles reuestu, Et Henry qui appreste Contre toy sa vertu. Dy-moy qu’esperes-tu De ta vaine asseurance, Qui dois estre abbatu Par le soldat de France ? L’impudente esperance De ton sot appareil Perira par l’outrance D’vn grand Roy sans pareil : Ton sang fera vermeil Mon flot ores esclaue, Et tout verd esmail De ces prez que ie laue. Voici le seigneur braue De Guyse qui te suit, Et ia son los engraue Sus ton dos qui s’enfuit, Prince sur tous instruit Aux dangereux vacarmes, Ou soit lors qu’il destruit Les troupes de gendarmes : Ou quand par les allarmes De sa pique l’effort Fait bien quitter les armes Au pieton le plus fort. Ne vois-tu le renfort Que Bouniuet ameine, Prompt à haster ta mort D’vne playe soudaine ? Comme la nuë pleine D’orage iniurieux Perd du bouuier la peine Qui prie en vain les Dieux, Le soldat furieux Qui ia desia t’enserre, Ton chef si glorieux Perdra d’vn grand tonnerre. Le Comte de Sanserre Et le Seigneur d’Iliers Te porteront par terre Indontez Cheualiers : Parmi tant de miliers Tu dois Iarnac cognoistre, Que les Dieux familiers Sous bon Astre ont fait naistre. Comme l’ayant fait estre De son haineux veinqueur, Et de soy-mesme maistre Commandant à son cœur : Toy peuple sans vigueur Les craindras en la sorte Qu’vn Loup craint la rigueur Du Lion qui l’emporte. A la fin la main forte Du grand Montmorenci Rendra ta gloire morte, Et ta malice außi : Le Ciel le veut ainsi, Qui ma bouche a contrainte Prophetiser ceci Pour t’auancer la crainte.