Poème 189 (D’un Ocëan qui nôtre jour limite…)

D’un Ocëan qui nôtre jour limite Jusques à l’autre, on ne voit point de fleur, Qui de beauté, de grace & de valeur, Puisse combatre au teint de Marguerite.

Si riche gemme en Orient élite Comme est son lustre affiné de bon heur, N’emperla point de la Conche l’honneur Ou s’apparut Venus encor petite.

Le pourpre éclos du sang Adonien, Le triste Ai Ai du Telamonien, Ni des Indois la gemmeuse largesse,

Ni touts les biens d’un rivage estranger, A leurs tresors ne sauroient eschanger Le moindre honneur de sa double richesse.