La Sage Considération

M ON ame, esueille toy du dangereux sommeil Qui te pourroit conduire en des nuits eternelles : Et chassant la vapeur qui couure tes prunelles, Ne pren plus desormais l’ombre pour le Soleil.

Ne croy plus de tes sens le perfide Conseil, C’est assez adorer des Obiects infidelles : Seruons à l’auenir des Beautez immortelles Que l’on treuue tousiours en vn estat pareil.

Aimons l’Autheur du monde, il est sans inconstance, Sa bonté pour nos vœux n’a point de resistance, Nous pouuons en secret luy parler nuit & iour :

Il cognoist nostre ardeur & nostre inquietude, Et ne reçoit iamais de traits de nostre amour Pour les recompenser de traits d’ingratitude.