Le Bain empoisonné

QVE le bon-heur est grand à quoy tu me destines ? Agreable present des Nimphes d’vn ruisseau, Bain qui viens de seruir de lict & de berceau, De seiour & d’habit à cent beautez diuines.

Mais, que ie sens icy de flames intestines, Ô Merueille funeste ! ô prodige nouueau ! Amour en vn brasier a conuerty ceste eau, Et ces Roses pour moy se changent en espines.

Ô Cieux ! que ce remede est pris mal à propos ! Ie rencontre vn supplice en cherchant du repos, Tant le ioug est cruel où le Destin me lie.

Ie trouue dans ce bain mille pointes de fer, Et ce qui fut naguere vn Ciel pour Roselie, Dés que i’y suis entré n’est plus rien qu’vn Enfer.