Le Bracelet

AMOVR en soit beny, le sujet de mes vœux, Cette ieune Beauté qui captiue mon Ame, De cent chaines de flame, La veut lier encore auec ses cheueux.

Cette chere faueur que ie n’osois pretendre, Rendra de mon destin les Dieux mesmes ialoux ; Voyans qu’vn feu si doux Se trouue accompagné d’vne si belle cendre.

Agreables chainons, beau fil d’Ambre flottant, Vous ne faisiez qu’errer autour de son visage ; Estiez vous si volage Pour venir auiourd’huy me rendre si constant ?

Ô Cieux ! ma seruitude est tellement plaisante, Que comparant les fers où ie suis arresté À quelque Royauté, I’estime vne Couronne importune & pesante.