Le dépit corrigé

C'EST trop long temps combattre vn orgueil inuincible Qui braue ma constance, & ma fidelité. Ne nous obstinons plus dans la temerité De vouloir aborder ce roc inacceßible.

Tournons ailleurs la voile, & s’il nous est poßible Oublions tout à fait ceste ingrate Beauté, Ne pouuans conceuoir qu’auecque lascheté Tant de ressentimens pour vne ame insensible.

Mais que dis tu mon cœur ? aurois tu consenty Au perfide dessein de changer de party, Seruant comme tu fais vn obiect adorable ?

Non, non, celle que i’aime est d’vn trop digne prix, Et tout autre Sujet n’est pas mesme capable De faire des faueurs qui vaillent ses mespris.