Le Favory mal content

IE proteste deuant les Cieux D’adorer à iamais vos yeux Dans vne Constance inuincible : Encore qu’en chaque action Vostre humeur vrayment insensible Se mocque de ma paßion.

Ie le dis auec verité Iamais rien que vostre beauté N’a trouué place dans mon Ame : Et pour se faire mon vainqueur Amour auec vne autre flame Ne pouuoit entrer dans mon cœur.

Ie sçay bien que i’ay mille fois Apellé des obiets mes Rois Dont ie n’estois point tributaire : Et iuré que pour leurs appas I’estois pensif & solitaire Quand mesme ie n’y pensois pas.

I’ay souuent feint vne langueur Pour accuser vne rigueur Qui m’estoit fort indifferente : Et loüé mille appas charmants Au visage d’vne Amarante, Contre mes propres sentimens,

Mais depuis que vous m’engagez Tous ces subjects sont bien vangez Des paßions qu’ils m’ont veu feindre : Et cette ardeur me punit bien, Des maux dont on m’entendoit plaindre Alors que ie ne sentis rien.

Yris ie n’ay plus de repos, Mon souuenir à tous propos Me vient representer vos charmes : Et persant à vos cruautez Ie ne fais que verser des larmes, Sur l’image de vos beautez.

La Cour du Prince que ie sers Me desplaist au prix des deserts ; Sa faueur mesme m’importune, Car le plus digne traictement, Que me peut faire la Fortune Ne peut adoucir mon tourment.

Dequoy me sert la vanité Qu’vne iuste prosperité M’esleue au dessus de l’Enuie : Et qu’vn monde voulust perir Afin de prolonger ma vie, Quand Iris me laisse mourir ?