Le Mespris

NE te ris plus de mes douleurs Perfide sujet de mes pleurs, Ingrate cause de mes plaintes : Tu ne fais plus mes desplaisirs, Mes tristesses ny mes souspirs, Tu ne me donnes plus d’atteintes, Et pour toy ie n’ay plus de craintes, D’esperances, ny de desirs.

Mon esprit abhorre ta loy, Tu m’as trop engagé ta foy, Et me l’as trop souuent faussee : Ie seray sage à l’aduenir, Ma peine commence à finir, Toute mon ardeur est passee, Et ie deffens à ma pensee De m’en faire plus souuenir.

Ie pourrois auec raison Punir ta lasche paßion, Et te noircir d'vn iuste blasme : Mais ie commence à negliger Le soin de te desobliger, Car cet obiect est trop infame Pour n'effacer pas de mon Ame La volonté de me vanger.

Pensers, mon aimable entretien, Ne me representez plus rien Des charmes de ceste cruelle : Ne me venez point abuser, Ne me venez point excuser Les deffauts de ceste Infidelle, Et ne me parlez iamais d'elle Si ce n'est pour la mespriser.