Le Despit salutaire

DESPIT altier Enfant d’vn desdain rigoureux Dont on fait vanité lors qu’on me desespere ; Vien rompre d’vn grand coup les fers d’vn mal-heureux, Et te rends dans mon Ame außi fier que ton Pere.

Ostons nous d’vn sentier inégal & pierreux, Où l’on ne trouue en fin qu’vne longue misere ; Les Roses qu’on y void dont i’estois amoureux, Couurent de leur eslcat vne noire vipere.

Souz vn aimable teint, ceste ieune Beauté Loge l’ingratitude auec la cruauté Pour gesner ses Amans d’vn eternel martyre.

De moy, qui n’aime point les longs sujets de pleurs, Quand ie voy qu’vn serpent souz des fleurs se retire, I’abhorre à mesme temps le serpent & les fleurs.