Les agréables pensées

MON plus secret conseil & mon doux entretien, Pensers, chers confidens, d’vne amour si fidelle, Tenez moy compagnie & parlons d’Ysabelle Puisqu’auiourd’huy sa veuë est mon souuerain bien.

Representez-la moy, dites moy s’il est rien D’aimable, de charmant & de rare comme Elle : Et s’il peut iamais naistre vne fille assez belle Pour auoir vn Empire außi grand que le sien.

Vn cœur se peut-il rendre à de plus belles choses ? Ses yeux sont de Saphirs & la bouche de Roses De qui le vif esclat dure en toute saison.

Ô que ce reconfort flatte mes réfveries ! De voir comme les Cieux pour faire ma prison Mirent des fleurs en œuure auec des pierreries.