Les cheveux blonds

FIN or de qui l’esclat est sans comparaison, Clairs rayons d’vn Soleil, douce & subtile trame Dont la molle estenduë a des ondes de flame Où l’Amour mille fois a noyé ma raison.

Beau poil vostre franchise est vne trahison ; Faut-il qu’en vous monstrant vous me cachiez Madame ? N’estoit-ce pas assez de captiuer mon Ame, Sans retenir ainsi ce beau corps en prison ?

Mais, ô doux flots dorez, vostre orgueil se rabaisse, Souz la seuerité d’vne main qui vous presse, Vous allez comme moy perdre la liberté.

Et i’ay le bien de voir vne fois en ma vie Qu’en liant le beau poil qui me tient arresté, On oste la franchise à qui me l’a rauie.