Pour la belle esclairée

QVE vostre diligence à mes vœux est contraire, Vous qui sur ma Phillis, veillez incessamment : Considerez vn peu qu’il n’est pas necessaire D’esclairer vn Soleil qui luit si viuement.

Prenez plus de repos pour mon contentement, Ne vous en tenez pas si prés qu’à l’ordinaire ; Et souffrez qu’en secret ie luy parle vn moment Puisque c’est le seul bien qui me peut satisfaire.

De grace, laissez nous l’vsage de la voix ; Ces charmantes beautez qui me donnent des loix Ne sont pas des sujets qu’on doiue ainsi contraindre.

Dieux ! auec vostre soin qui me vient trauerser, Et dont vous m’empeschez auiourd’huy de me plaindre, Vous deuiez empescher ses yeux de me blesser.