Misère de l’homme du monde

VEnir à la clarté sans force & sans adresse, Et n’ayant fait long temps que dormir & manger, Souffrir mille rigueurs d’vn secours estranger Pour quitter l’ignorance en quittant la foiblesse.

Apres, seruir long temps vne ingratte Maistresse, Qu’on ne peut acquerir, qu’on ne peut obliger ; Ou qui d’vn naturel inconstant & leger, Donne fort peu de ioye & beaucoup de tristesse.

Cabaler dans la Cour ; puis deuenu grison, Se retirant du bruit, attendre en sa maison Ce qu’ont nos derniers ans de maux ineuitables.

C’est l’heureux sort de l’homme. Ô miserable sort ! Tous ces atachemens sont-ils considerables, Pour aimer tant la vie, & craindre tant la mort ?