A la sura Lenin Millesi

Se fuss bon de fà vers a l’improvvisa, Sì che vorev fà el mut in st’occasion! Ghe giuri che vorev dagh dent de frisa, E el giuri d’onorato buseccon. Sont galantomm, e quand ghe rivi a dì Che sont on asen, ch’el le creda a mì.

Chè del rest, se godess sto don del ciel, Nanch per insogn che la vorev pientà; Ma vorev propi propi stagh al pel Ai tante cortesij che la me fà, E inscambi de confondem e avvilimm, Vorev almanch respondegh per i rimm.

E tanto mej poeù adess che la me iruiga Con quell sò ton cordial, con quell cerin, Con quell fà inscì grazios, ch’ par ch’el diga Fatt coragg, dì pur sù, el mè meneghin, Chè infin dopo disnaa per rid de cœur Hin giust quatter sproposet che ghe vœur.

Sproposet? nò per brio! Adasi on poo; Gh’hoo la botta secretta.... Scià el biccier: Viva, sura Millesia, el sò bell coo, El sò bell anem, el sò cœur sincer; Viva el sò spiret che se pò cercall Via de sti mur, ma stantà assee a trovall.

Viva, sura Millesi, quell tusscoss Che fa corr per la bocca la saliva De tucc quij che le tratta e el le cognoss; Evviva donca, milla vœult evviva. Hala mò vist adess se a sto proposet Gh’hoo anmì la vergna de sparmì i sproposet?