Alto scià penna, carta e carimaa

Alto scià penna, carta e carimaa, E giustemm el nost cunt, sur Martinell: Ch’el varda chi che hoo giusta preparaa Tiraa fœura anca mi el mè cuntarell:

A lu: tant per lenzœu slisaa e sporcaa, Tant per pan, per pitanza e firisell; A mi: tant per falzett e gipp, s’cioppaa A furia de paccià come on porscell;

A lu: tant per carocc inanz indree; Tant per caffè, sorbitt, acqu e bombon; Tant per latt, ciccolatt, cruzi e cuntee;

A mi: tant per la tolla del faccion; Tant per cremor de tarter al speziee; Tant al dottor per l’indigestion. Vedi a la conclusion.

Sur Martinell. che i cunt hin lì p«r lì, Se fors’anch no me ven quejcoss a mì, Come sarav a dì:

Tant per la frustadura di ganass, Per i dent de nettass e de strappass, E per el vegnì grass

Tant de pu, in di vestii, de tila e pann, Ch’el capirà che l’è minga pocch dann, E màssem in sti ann

Ch’el vestiari l’è montaa a quell segn, Che mej che grass l’è asquas vess in di legn. Donca lu col sò ingegn

El vedarà che, a vorè stà a rigor, Restarèv mi a la longa creditor; Ma no stemm a descor

De danee.... pover lu.... nò.... el me fa tort.... Se incontraremm.... già no semm minga mort.... E poeú femm de sta sort,

Ch’el tegna sald.... puttost tornaroo chì A stà con lu ancamò per quindes dì.