Catto! el me dis, che i soeu paroll toscann

Catto! el me dis, che i sœu paroll toscann Hin tutta grazia, tutta ziviltaa, E pœu el ne sgogna dopo a brazz de pann, Senza che gh’abbiem faa nè ben nè maa?

Ma catto! s’el voreva strapazzann, El doveva almanch fall in sbottasciaa, Sbassass, come el dis lu, trattann, parlann Cont el lenguagg di goff e di rabbiaa!

Inscì mo, coss’hal faa con la sua piatta? L’ha sassinaa de pianta i sœu argoment, E el se desfaa lù de per lù la fatta:

E col vorrè stà sù e fà el caga in l’olla, L’ha obblegaa a volzass nun per stagh arent, E a digh sù in bon toscan: Stelle che chiolla!