El mangià e bev in santa libertaa

El mangià e bev in santa libertaa In mezz ai galantommen, ai amis, In temp d’inverna al cold, al frecc d’estaa, Diga chi vœur, Ve on gust cont i barbis;

Ma se pœu se ghe gionta el vess trattaa A macca, come incœu dal nost Luvis, Et quidem con quell cœur larg inscì faa, Cossa serva! l’è on gust de paradis.

E el gh’è pceu anch quest de bon, che el Tordorò, Sto so bell paradis, el ne le dà Senza fann romp in prima i ci-o-cò;

Che, a quistall, no ghe vœur macerazion, E per godell dadrizz basta domà Mortificass on poo in la colazion.