Italian poem
El temporal
by Carlo Porta (1775–1821)
Carolina, varda, varda Come sguizza la saetta, Che tronada malarbetta! Sent el turben che ingajarda.
Se quell ciall de don Galdin Noi desmett con quij campann, El forniss cont el tirann On quej fulmen sul coppin.
Carolina, Carolina, Minga in gesa per amor! Va a toeù i ciav, prest prest, côr côr, Giò giò, andemm tutt duu in cantina.
Giò giò, andemm, no te dubitta Che quij bej zifer morell Pitturaa sott al bocchell Del mezzin salven la vitta.
Che s’ ciarô!... Santa Maria! Franch l’è on fulmen ch’è s’ cioppaa. Che?... Perchè mi hoo bestemmaa? ... Mi?... Set matta! va on poo via.
Varda i fìamm, várdej lassù; L’è s’ cioppaa in del campanin.... E mò, quell bevevel vin? Bestemmavel anca lù?
Giò, giò, andemm senza tant ciaccol, Che quij bej zifer morell Pitturaa sott al bocchell Del mezzin faran miracol.