El sarà vera fors quell ch'el dis lu

El sarà vera fors quell ch’el dis lu, che Milan l’è on paes che mett ingossa, che l’aria l’è malsana, umeda, grossa, e che nun Milanes semm turlurù.

Impunemanch però el mè sur Monsù hin tredes ann che osservi d’ona cossa, che quand lor sciori pienten chì in sta fossa quij benedetti verz no i spienten pù.

Per ressolv alla mej sta question, Monsù ch’el scusa, ma no poss de men che pregall a addattass a on paragon.

On asen mantegnuu semper de stobbia, s’el riva a mangià biava e fava e fen el tira giò scalzad fina in la grobbia.