E daj con sto chez-nous: ma sanguanon!

E daj con sto chez-nous: ma sanguanon! Subet ch’el gh’ha sta gran cuccagna in Franza, Ghe va tant a andà fœura di cojon E a tornà a cà a godella sta bondanza?

In quant a nun, s’el ne usa st’attenzion, In contrassegn de grata regordanza El scassem subet giò del tabellon Di baloss e di porch senza creanza.

Anzi, ch’el varda, vuj ch’el preghem fina De no fà olter quand el riva a cà Che parlà maa de nun sira e mattina.

Inscì almanch podatavem lusingass Che paricc finalment, dandegh a trà, Barattassen el sit d’andà a seccass.