Diciarazion d'Akmett

Anca sì ben che gh’abbia nom Akmett, Me declari però bon Cristian, Catolegh, apostolegh e roman, Fedel mincion, che no me calla on ett.

Hoo domandaa a paricc, perchè per-comm Hann vorsuu nominamm come on can bracch; Tucc m’han daa di reson, ma hin reson fiacch, Che nissun sa el perchè gh’abbia sto nomm.

Gh’è staa vun ch’el m’ha diti, che l’è perchè Gh’hoo on’ideja sul gust oriental, Come se ved deffatti in sui vental E in sui basgiann antigh di canapè;

On olter el m’ha ditt, che l’è per via Che bevi come on Turch e che voo in gippa; On olter, perchè gh’hoo on mostacc de pippa. De qui pipp che se fabbrega in Turchia;

Finalment sont daa dent in d’on baccilla Ch’el sosten, ch’even Turch tucc i mè cent, Ch’han traa insemma on besasc d’on falliment, Ch’hin scappaa da la Mecca senza pilla.

Mi però, che no en soo on cazz de la Mecca, Poss provà a tutt el mond, coi cart in man, Che sont nassuu e battezzaa a Milan Coli acqua del Fossaa, che gira in Zecca.