Carmen VIII

Quid Galliarum navibus aut equis Paret minatus Carolus, asperi Furore militis tremendo, Turribus ausoniis ruinam: Rursus quid hostis prospiciat sibi, Me nulla tangat cura, sub arbuto Iacentem aquæ ad murmur cadentis, Dum segetes Corydona flavæ Durum fatigant. Philiroe meum, Si mutuum optas, ut mihi sæpius Dixisti, amorem, fac corolla Purpureo variata flore Amantis udum circumeat caput, Quam tu nitenti nexueris manu; Mecumque cespite hoc recumbens Ad cytharam canito suave.