Clam

Sentio sub me validum fiatum, vox mihi salda est: quid erit, Philippe, si meae laudes canimus Zaninae? Accipe pivam. Merl. Coccai. Zanitonella. Ecl. I.

O

Ecce manet nos paratum, hic sub umbris molle stratum; ecce vocat nos peccatum, ecce vocant praelia.

Flos labiarum, flos amoenus flos amoris mellis plenus, Io, quam dulcis ridet Venus in labellis roseis!

Io, quam fortis, quam formosa Cinthia mea pruriginosa, tendis ilia illecebrosa amatorio impetu!

Io peccatum, Io blanditiae, Io convicium pudicitiae; Io postremus, Io, letitiae apex ineffabilis!

Iam demissi sunt lacerti nuper collo meo conserti; languescentes et incerti ecce pallent oculi.

Prostat pulvinar fucatum flecte caput fatigatum, sterne, Cinthia, sterne latum, prostat conscia culcita.

Dum en carmen susurrabo, tibi somnum conciliabo, tuam flabello ventilabo nuditatem candidam.

Dicam nunc amoris laudes, dicam basia, amplexus, fraudes quibus tu, mea Cinthia, gaudes, quibus ego pereo.

Euge, impelle in hymni sonum rabiem frigidam spadonum, stilum, censor, sume bonum: Euge. Rido ad lacrimas.

E

L