« Je vous offre ces vers qu’Amour m’a fait écrire »

Ie vous offre ces vers qu’Amour m’a faict escrire, De vos yeux ses flambeaux ardemment agité, Non pour sacrer ma peine à l’immortalité : Car à si hault loyer ma ieunesse n’aspire.

C’est le but de mes vœux, que ie vous face lire Le variable estat de ma captiuité, Celebrant vos honneurs si ie suis bien traitté, Accusant vos rigueurs si ie sens du martyre.

Ie n’agrandiray point, riche d’inuentions, Vos beautez, vos dédains, ma foy, mes passions, Il suffira qu’au vray mon crayon se rapporte.

Et puis ie n’escry pas pour gloire en acquerir, Ains plustost je m’escrie au mal qui me transporte, Ainsi qu’vn patient qui languît sans mourir.