La Lune est coustumiere

» LA Lune est coustumiere » De naistre tous les mois : » Mais quand nostre lumiere » Est esteinte vne fois, » Sans nos yeux resueiller » Faut long temps sommeiller. Tandis que viuons ores, Vn baiser donnez-moy, Donnez-m’en milles encores, Amour n’a point de loy : A sa Diuinité Conuient l’infinité. En vous baisant Maistresse, Vous m’auez entamé La langue chanteresse De vostre nom aime. Quoy ? est-ce là le prix Du trauail qu’elle a pris ? Elle par qui vous estes Déesse entre les Dieux, Qui vos beautez parfaites Celebroit iusqu’aux Cieux, Ne faisant l’air sinon Bruire de vostre nom ? De vostre belle face Le beau logis d’Amour, Où Venus & la Grace Ont choisi leur seiour, Et vostre œil qui fait Le Soleil moins parfait : De vostre sein d’yuoire Par deux ondes secous Elle chantoit la gloire, Ne chantant rien que vous : Maintenant en saignant, De vous se va plaignant. Las ! de petite chose Ie me plains sans raison : Non de la playe enclose Au cœur sans guerison, Que l’Archer ocieux M’y tira de vos yeux.