Ma petite Colombelle

MA petite colombelle, Ma mignonne toute belle, Mon petit œil baisez moy : D’vne bouche toute pleine De musq, chassez-moy la peine De mon amoureux esmoy. Quand ie vous diray Mignonne, Approchez vous qu’on me donne Neuf baisers tout à la fois, Donnez-m’en seulement trois, Tels que Diane guerriere Les donne à Phœbus son frere, Et l’Aurore à son vieillard : Puis reculez vostre bouche, Et bien loin toute farouche Fuyez d’vn pied fretillard. Comme vn toreau par la prée Court apres son amourée, Ainsi tout chault de courrous Ie courray fol apres vous : Et prise d’vne main forte Vous tiendray de telle sorte Qu’vn Aigle vn Cygne tremblant : Lors faisant de la modeste, De me redonner la reste Des baisers ferez semblant. Mais en vain serez pendante Toute à mon col, attendante (Tenant vn peu l’œil baissé) Pardon de m’auoir laissé. Car en lieu de six adonques I’en demanderay plus qu’onques Tout le Ciel d’estoiles n’eut, Plus que d’arene poussée Aux bords quand l’eau courroussée Contre les riues s’esmeut.