Ma petite Nymphe

MA petite Nymphe Macée, Plus blanche qu’yuoire taillé, Plus blanche que neige amaßée, Plus blanche que le laict caillé, Ton beau teint resemble les liz Auecque les roses cueillis. Descœuure moy ton beau chef-d’œuure Tes cheueux où le Ciel donneur Des graces richement descœuure Tous ses biens pour leur faire honneur : Descœuure ton beau front außi, Heureux obiect de mon souci. Comme vne Diane tu marches : Ton front est beau, tes yeux sont beaux, Qui flambent sous deux noires arches, Commes deux celestes flambeaux, D’où le brandon fut allumé, Qui tout le cœur m’a consumé. Ce fut ton œil douce mignonne, Qui d’vn fol regard escarté Les miens encores emprisonne Peu soucieux de liberté, Tous deux au retour du Printemps, Et sur l’Auril de nos beaux ans. Te voyant ieune, simple, & belle, Tu me suces l’ame & le sang : Monstre moy ta rose nouuelle, Ie di ton sein d’yuoire blanc, Et tes deux rondelets tetons Qui s’enflent comme deux boutons. Las ! puis que ta beauté premiere Ne me daigne faire merci, Et me priuant de ta lumiere Prend son plaisir de mon souci, Aumoins regarde sur mon front Les maux que tes beaux yeux me font.