Ô de Nepenthe et de liesse pleine

Ô de Nepenthe et de liesse pleine Chambrette heureuse, où deux heureux flambeaux, Ces deux beaux yeux plus que les Astres beaux, Me font escorte apres si longue peine ! Or’ je pardonne à la mer inhumaine, Aux flots, aux vents, la traison de mes maux, Puis que par tant et par tant de travaux Une main douce à si doux port me meine. Adieu tormente, adieu naufrage, adieu Vous flots cruels, ayeux du petit Dieu, Qui dans mon sang a sa fleche souillée : Ores ancré dedans le sein du port, En vœu promis, j’appan dessus le bord Aux Dieux marins ma despouille mouillée.