O Terre, ô Mer

OTerre, ô Mer, ô Ciel espars Ie suis en feu de toute pars: Dedans & dehors mes entrailles Vne ardente chaleur me poind Plus fort qu'vn mareschal ne ioint Le fer tout rouge en ses tenailles. La chemise que escorcha Hercul' si tost qu'il la toucha, N'egale point la flamme mienne, Ny de Vesuue tout le chaud, Ny tout le feu que rote en hault La fournaise Sicilienne. Le iour les soucis presidans Condamnent ma coulpe au dedans, Et la genne apres on me donne: La peur sans intermißion Sergent de leur commißion Me poind, me pique, & m'eguillonne. La nuict les fantômes volans Claquetans à becs gromelans En siflant mon ame espouuantent, Et les Furies qui ont soing Venger le mal, tiennent au poing Les Couleuures qui me tourmentent. Il me semble que ie te voy Murmurer des charmes sur moy, Tant que d'effroy le poil me dresse: Et que mon chef tu vas lauant D'vne eau bourbeuse bien auant Puisée au fleuue de tristesse. Que veux-tu plus ? dy, que veux-tu ? Ne m'as-tu pas asses batu ? Veux-tu qu'en cest âge ie meure ! Me veux-tu brusler foudroyer, Et tellement me poudroyer Qu'vn seul osset ne me demeure ? Ie suis appresté si tu veux, De te sacrifier cent bœufs A fin de desenfler ton ire: Ou si tu veux auec les Dieux Ie t'enuoyray là haut aux Cieux Par le son menteur de ma Lyre. Les freres d'Helene faschez Pour les Iambes delaschez Contre leur sœur par Stesichore, A la fin luy ont pardonné, Et pleins de pitié redonné L'vsage de la veuë encore. Tu peux helas (Denise) außi Rompre la teste à mon souci, Te flechissant par ma priere: Rechantes tes vers & les traits De ma face en cire portraits Iette au vent trois fois par derriere. L'ardeur du courroux que lon sent Au premier âge adolescent, Me fist trop nicement t'escrire: Maintenant humble & repentant, D'œil non feint ie vay lamentant La iuste fureur de ton ire.