Quand tu n’aurois autre

QVand tu n’aurois autre grace Ny autre present des cieux, Sinon sortir de la race De tant de Rois tes ayeux, I’aurois encor trop de lieux Pour te bastir vne gloire. Car si ie veux raconter De ton grand Buillon l’histoire, Qui peut les Turcs surmonter Par vne heureuse victoire : Ou la fameuse memoire De ses freres, ou les Rois Tes ayeux, dont la Sicile A leur obeyr docile Escouta les fainctes lois : Leur nom qui le temps surmonte, Te feroit seul immortel : Mais ta vertueuse honte Rougiroit d’vn honneur tel. Ie te veux faire vn autel, Où maugré l’an qui tout mange, Ton propre loz ie peindray, D’vne encre qui ne se change : Et là ce vœu ie prendray, Qui au pelerin estrange Racontera ta louange, Et la vertu qui reluit Par les ans de ta ieunesse, Comme l’or sur la richesse, Ou la Lune par la nuit. Tout l’honneur qui seul en France Du sein des Dieux s’escoula, Pour illustrer ton enfance Dessus ton front s’en-vola, Et depuis s’est planté là. Donques Prelat de bon-heur, Qui tiens le sommet d’honneur, En qui nostre Roy contemple Des vertus le vray exemple, Sois content d’vn si grand bien, Et ne souhaite plus rien. Car toy qui ta vie arroses Du miel des heureuses choses, D’auantage à qui ie donne Ceste Hynne que ie moissonne Des Charites au milieu, Cesse de plus rien attendre, Et ne vueilles point apprendre A te faire vn nouueau Dieu.