Stances, sur le gris

 L’amour est vn beau feu que l’Eternité saincte Couua premierement dans le Gris son berceau, Le gris fust le chaos qui de sa masse enceincte Enfanta l’Vniuers pour estre son tombeau.  Principe des couleurs außi bien que l’extresme, Gris symbol parfaict de la diuinité, Tu procedes de toi & r’entres en toi-mesme, Marque de mon Amour pour ton infinité.  Quand tu destruis les corps ô Nature inconstante, Le rouge vole au feu, le bleu s’eslance aux airs, Le verd coule auec l’eau, & la terre constante Prend le Gris, ennemi de ceux qui sont legers.  Si le ciel amoureux veut feconder la terre, Ou guerroier d’esclairs les Titans chaleureux, Il prend le Gris, & vaincq en amour & en guerre ; L’Amant & le guerrier qui le porte est heureux.  Nature peint de Gris les Aigles genereuses, La Colombe doucette & le noble Espreuier, La chaste Tourterelle, & ses formes nombreuses N’animent rien de Gris qui ne soit singulier.

 Soudain que les bouillons de la folle ieunesse Laissent nostre cerueau, le Gris se peint dessus, Puis quitte son seiour à la froide vieillesse, Il fuit autant le fol comme le paresseux.  L’œil miracle des corps anime ses flammesches Dans les beaux cercles Gris qui parent sa rondeur, De-là l’Amour haultain va décochant ses flesches, Et ne veut que le Gris pour Ciel de sa grandeur.  Mars se pare de Gris au jour de la bataille, Aprés mille labeurs le Gris couure les naus : C’est pourquoi le beau Gris denote qu’on trauaille, Le Gris & la vertu naissent dans les travaux.  Le Gris est le milieu de deux couleurs extresmes, Le milieu est le but que les vertus ont pris, Puis donc que les vertus & le Gris sont de mesmes, Qui aime la vertu, il aimera le Gris.  Qui te peut honorer par des loüanges dignes, Beau Gris, le fauori du grand Roi des François, Il a conioinct à toi tant de Palmes insignes, Que ie perds t’admirant & l’esprit & la voix.

A. D. V.