Ich fröwe mich gen dem Meijen nichtes nicht

Ich fröwe mich gen dem Meijen nichtes nicht in getrurt ǒch nie gen des winters zit sol aber mich erfröwen ichtes icht das sol tůn ein wib an der min fröide lit sol ich truren das kumt von ir schulden sênfter wolt ich dulden den tot ê· ich enber ir hulden

Si sprichet vil si si min frúnt gar gůt vnd wil doch nicht tůn das min herze gert wa bi sol frúnt erkennen frúndes můt frúnt sol sin gen frúnde das er werde gewert vrǒwe bist dú min frúnt das la schin werden liebe min sprich ia so lebe ich sunder pin

Wan seit das in himilriche si fröiden vil swes den man lúste dv́ fröide si im na durch iren willen ich dar komen wil wirt si mir nicht hie secht so wirt si mir da möcht aber mir ir hulde werden ich belibe vf der erden al hie got lies ich dort die werden